有留意我thread嘅都知道我啱啱放完產假（我係拎咗 1 年產假嘅）。
好多人都關心：「放產假究竟有冇人工？」
其實呢個問題，喺我計劃生 BB 嘅時候都考慮咗好耐。始終仲要供樓，成年唔返工，財務安排一定要預早計劃。
以加拿大嚟講，大部分產假收入都係由政府嘅 Employment Insurance (EI) 提供，而唔係由僱主直接出糧。
EI 會根據你之前嘅收入去計算，一般嚟講：
- Standard parental leave：最多可以領取 55% 嘅平均每星期收入（有上限，所以如果平時收入比較高，就要預咗會少咗一截）
- Extended parental leave：可以領取較低比例，但領取時間會更長，適合想放更長產假嘅家長
實際可以攞幾多，就要視乎你過往收入同政府每年公布嘅 EI 上限。
另外，唔少公司都會提供 Top-up（補薪），即係除咗 EI 之外，公司會額外補返一部分人工，等你放產假期間收入更接近平時人工。不過每間公司政策都唔同，例如：
- 補幾多個百分比
- 補幾耐（例如 8 星期、17 星期或更長，我知有公司補足成年，可惜這些機會不是我的）
- 有冇服務年期要求
- 需唔需要之後返工一段時間，否則要退還 Top-up
所以如果有計劃生 BB，建議早啲睇清楚自己公司嘅產假政策。
仲有一點好多人容易忽略，就係 醫療福利（Medical Benefits）。
有啲公司喺你放產假期間會繼續提供醫療、牙科、眼科等福利；有啲則需要你自己繼續供保費，或者保障會有改變。最好喺放假前向 HR 確認清楚，避免到有需要用保險時先發現唔受保。
最後分享一個好多人都未必知道嘅小知識：如果你係領取 maternity／parental EI，期間係可以去海外旅行嘅，只要你仍然符合相關資格，就唔會因為離開加拿大而失去福利。
呢點同一般 Regular EI 有少少唔同。Regular EI 一般情況下出國期間未必符合領取資格，因為申請人需要保持 available for work；但 maternity/parental EI 只要繼續符合相關資格，即使身處加拿大境外仍然可以領取。
我就趁呢段日子返左香港幾個月見屋企人，其實幾爽！
如果你準備生 BB，不妨早啲了解 EI、公司 Top-up 同福利安排，做好財務規劃，咁放產假都可以安心啲。